ائیرپورٹس پرمسافروں کی اسکریننگ کابہترین اورموثرنظام موجودہے،ڈاکٹرفیصل

ڈاکٹر فیصل سلطان نے کہا ہے کہ ملک کے ائیرپورٹس پر مسافروں کی اسکریننگ کا بہترین اور موثر نظام موجود ہے۔

معاون خصوصی صحت ڈاکٹر فیصل سلطان نے اسلام آباد ایئرپورٹ کا دورہ کیا اور کورونا وائرس سے بچاؤ کیلئے اسکریننگ اور ٹیسٹنگ کے انتظامات کا جائزہ لیا۔

اس موقع پر میڈیا سے بات کرتےہوئے ان کا کہنا تھا کہ تمام ایئرپورٹس پر کرونا وائرس سے نمٹنے کیلئے بھرپور اور موثر اقدامات کررہے ہیں اور انٹرنیشنل ہیلتھ ریگولیشنز کی سفارشات پر عمل درآمد کو یقینی بنارہے ہیں۔

انھوں نےبتایا کہ تمام ایئرپورٹس اور پوائنٹ آف انٹریز پر ٹیسٹنگ اوراسکریننگ کے نظام کو مضبوط بنایا ہے۔

ڈاکٹر فیصل سلطان نے کہا کہ حکومت کرونا وائرس سے بچاؤ کیلئے موثر اقدامات کر رہی ہے۔عوام کو چاہیئے کہ کرونا سے بچاؤ کیلئے ایس او پیز پر سختی سے عمل درآمد کریں۔ ماسک کا استعمال کریں اور تمام اہل افراد ویکسینیشن ضرور کروائیں۔

انھوں نے یہ بھی بتایا کہ اسلام آباد ایئرپورٹ پر باہر سے آنے والے مسافروں کی روزانہ کی بنیاد پرریپیڈ انٹیجن کٹ سے ٹیسٹنگ کی جارہی ہے۔

اس کےعلاوہ این سی او سی کے سربراہ اسد عمر نے ٹویٹ کرتے ہوئے بتایا کہ آج پاکستان میں اب تک ہونے والی کرونا ویکسینیشن کی تعداد ایک کروڑ سے تجاوز کر جائے گی۔ عوام کی بڑی تعداد رجسٹر بھی ہورہی ہے اور ویکسین بھی بڑی تعداد میں لگائی جا رہی ہے۔

بدھ کو این سی او سی نے بتایا ہے کہ 24  گھنٹوں میں 1 ہزار 118 نئے کرونا کیسز رپورٹ ہوئے۔ ملک میں مثبت کرونا کیسز کی شرح 2.54 فیصد ہے۔ کرونا کے باعث سب سے زیادہ پنجاب میں 48 اور سندھ میں 20 اموات ہوئیں۔ خیبرپختونخوا میں 6 اموات ہوئیں جبکہ بلوچستان میں 1 اور آزاد کشمیر میں 2 اموات ہوئیں۔کرونا سے مجموعی اموات کی تعداد 21 ہزار 453 ہو گئی ہے۔

متعلقہ خبریں