اداکارہ نائلہ جعفری کینسر سے انتقال کر گئیں ’آپ کی ملین ڈالر مسکراہٹ یاد رہے گی‘

پاکستان ٹیلی ویژن ڈرامہ انڈسٹری کی سینئر اداکارہ نائلہ جعفری کراچی میں انتقال کر گئی ہیں۔

نائلہ جعفری گزشتہ چھ سال سے کینسر کے مہلک مرض میں مبتلا تھیں۔

نائلہ جعفری کی نماز جنازہ سنیچر کو بعد نماز عشاء ڈیفنس فیز ٹو میں ادا کی جائے گی۔

حال ہی میں اداکارہ نائلہ جعفری کو انفیکشن کی وجہ سے ہسپتال داخل کرایا گیا تھا۔

اداکارہ نائلہ جعفری نے متعدد ڈراموں میں اداکاری کے جوہر دکھائے۔ انہوں نے مشہور ڈرامہ سیریلز ماں مجھے سلانا، دیسی گرلز اور تھوڑی سی خوشیاں کے علاوہ متعدد ڈراموں میں بہترین اداکاری سے اپنی صلاحیتوں کا لوہا منوایا۔

ٹوئٹر صارف فرقان صدیقی نے نائلہ جعفری کی وفات پر افسوس کرتے ہوئے ٹویٹ کیا کہ ان کی انتہائی قریبی دوست نائلہ جعفری کینسر کی طویل جنگ کے بعد انتقال کر گئی ہیں، وہ انتہائی بہادر انسان تھیں جنہوں نے یہ جنگ حکومت سے امداد لیے بغیر لڑی۔ ’آپ اور اپ کی ملین ڈالر مسکراہٹ ہمیشہ یاد رہے گی۔‘

اداکار فیصل قریشی نے ٹوئٹر پر اظہار افسوس کرتے ہوئے کہا کہ وہ قریبی ساتھی کی وفات پر شکستہ دل ہیں۔ فیصل قریشی نے کہا کہ نائلہ جعفری کی مضبوطی کی علامت تھیں اور ان کا کام ہمیشہ ہمارے دلوں میں زندہ رہے گا۔

کچھ عرصہ پہلے ان کی ایک ویڈیو وائرل ہوئی تھی جس میں انہوں نے مخیر حضرات سے کینسر کے علاج کے لیے امداد کی اپیل کی تھی۔