انوشکا شرما اور وراٹ کوہلی کی پہلی ملاقات کیسے ہوئی؟

سنیچر کو بالی وڈ سٹار انوشکا شرما نے اپنی 33 ویں سالگرہ منائی، ہم آپ کو تھوڑا ماضی میں لے چلتے ہیں جب انوشکا شرما اور وراٹ کوہلی کی شیمپو کے اشتہار کی شوٹنگ پر پہلی ملاقات ہوئی۔

ہندوستان ٹائمز کے مطابق اگرچہ انوشکا شرما ایک ایکٹر ہیں تاہم وراٹ کوہلی سے ان کی ملاقات کی کہانی بالی وڈ کی کسی رومانوی کامیڈی فلم کی کہانی سے کم نہیں۔

سنہ 2013 میں انوشکا شرما اور وراٹ کوہلی کی پہلی ملاقات ہوئی اور یہ ملاقات شیمپو کے ایک اشتہار کی شوٹنگ پر ہوئی جس میں دونوں ماڈلنگ کر رہے تھے۔

جیسے ہی یہ اشتہار آن ایئر ہوا کرکٹ اور بالی وڈ فینز نے حیرانی کا اظہار کرنا شروع کر دیا کہ شاید ان دونوں کی آن لائن کیمسٹری کے پیچھے کوئی راز چھپا ہے۔

اس کے کچھ عرصے بعد ہی انوشکا نے فلم فیئر میگزین کو ایک انٹرویو میں کہا کہ ’آپ مجھے سے پوچھیں گے کہ کیا وراٹ میرے گھر آئے؟ ہاں۔ کیا وہ میرے دوست ہیں؟ ہاں۔ کیا میں انہیں جانتی ہوں؟ ہاں۔ لیکن یہاں اور بھی تفصیلات ہیں جنہیں لوگ نہیں جانتے۔‘

’ہم نے ایک اشتہار میں اکٹھے کام کیا ہے، میں نے ان کے خلاف کچھ متکبرانہ رویہ اختیار کیا کیونکہ ان کے بارے میں مشہور تھا کہ وہ مغرور سمجھے جاتے ہیں۔‘

انوشکا شرما کا کہنا تھا کہ ’اس سے قبل کہ وہ (وراٹ کوہلی) کوئی ایسی بات کرتے میں ان پر اپنی برتری رکھنا چاہتی تھی۔‘

’لیکن جب میں ان سے ملی تو وہ بہت بردبار، ذہین اور ہنسی مذاق کرنے والے شخص نظر آئے۔‘

انہوں نے کہا کہ ’اس اشتہار کی شوٹنگ تین روز تک جاری رہی اور دوسری رات میں نے اپنے نئے گھر کی خوشی میں دوستوں کو ڈنر پر بلا لیا۔ میں نے انہیں (وراٹ کوہلی) کو بھی دعوت دی۔‘

’یہیں سے ہماری دوستی شروع ہوئی۔ دعوت پر دیگر لوگ بھی موجود تھے تاہم ان کی موجودگی کا کسی نے نوٹس نہیں لیا۔‘

وراٹ کوہلی کا کہنا تھا کہ ‘جب میں پہلی بار انوشکا سے ملا تو میں نے انہیں فوراً ایک لطیفہ سنا دیا (فوٹو: اے ایف پی)

اس اشتہار کے بعد حتیٰ کہ 9 برس بعد بھی وراٹ اور انوشکا ایک جوڑے اور والدین کی حیثیت سے ہیڈلائنز بنا رہے ہیں۔

ان کے ہاں رواں برس جنوری میں بیٹی وامِکا کی پیدائش ہوئی، ان کی شادی کو تین برس سے زیادہ ا عرصہ ہوگیا ہے۔

وراٹ بھی اُس اشتہار کے شکرگزار ہیں جس کی وجہ سے دونوں کی ملاقات ہوئی اور ان کے درمیان محبت کی چنگاری جلی۔

ایک انٹرویو میں وراٹ کوہلی کا کہنا تھا کہ ’جب میں پہلی بار (اُن سے) انوشکا سے ملا تو میں نے انہیں فوراً ایک لطیفہ سنا دیا۔ میں نروس تھا اور اسی لیے میں نے لطیفہ سنایا کیونکہ مجھ سمجھ نہیں آرہی تھی کہ میں کیا بات کروں۔‘

’انوشکا سے ملاقات سے قبل میں سیٹ پر نروس کھڑا تھا، انوشکا کا قد بھی اچھا ہے اور انہیں بتایا گیا تھا کہ میرا قد 6 فٹ یا اس سے زیادہ نہیں ہے، لہٰذا آپ بڑی ہیل وغیرہ نہ پہنیں۔‘

انوشکا شرما اور وراٹ کوہلی کی پہلی ملاقات شیمپو کے اشتہار کی شوٹنگ پر ہوئی (فوٹو: اے ایف پی)

‘وہ چل کر آئیں اور مجھ سے لمبی نظر آرہی تھیں۔ میں ان سے کہا کہ کیا آپ کے پاس اس سے زیادہ لمبی ہیلز نہیں ہیں؟ انہوں نے مجھے کچھ اس طرح سے جواب دیا، ‘ایکسکیوز می۔‘ میں نے کہا کہ ’میں تو مذاق کررہا تھا۔‘

وراٹ کا کہنا تھا کہ ’میرا مذاق انوشکا کے لیے عجیب تھا، میں نے بے وقوف شخص کی طرح سلوک کیا، سچی بات ہے۔‘

واضح رہے کہ انوشکا شرما اور وراٹ کوہلی کی شادی 11 دسمبر 2017 کو ہوئی تھی۔