اہم تقرریاں اور تبادلے: ’ڈی جی ایف آئی اے واجد ضیا تبدیل‘

بدھ 9 جون 2021 15:52

وفاقی حکومت نے اہم عہدوں پر نئی تقرریاں اور تبادلے کیے ہیں۔ وفاقی تحقیقاتی ادارے (ایف آئی اے) کے ڈائریکٹر جنرل واجد ضیا کو عہدے سے ہٹا دیا ہے۔ آئی جی خیبر پختونخوا ثنا اللہ عباسی کو نیا ڈی جی ایف آئی اے مقرر کیا گیا ہے۔
وزارت داخلہ کے ایک ترجمان نے اردو نیوز کو بتایا کہ ’وفاقی کابینہ نے سرکولیشن سمری کے ذریعے بدھ کے روز واجد ضیا کو ہٹانے کی منظوری دی۔ انہیں نیشنل پولیس بیورو کا سربراہ تعینات کردیا گیا ہے۔‘
واجد ضیا اس جے آئی ٹی کے سربراہ تھے جس نے پانامہ کیس میں سابق وزیراعظم نواز شریف کے حوالے سے تحقیقات کی تھیں۔
معظم جاہ کو ثنا اللہ عباسی کی جگہ خیبر پختونخوا کا نیا آئی جی تعینات کیا گیا ہے جبکہ سابق آئی جی خیبر پختونخوا صلاح الدین محسود کو آئی جی ایف سی مقرر کر دیا گیا ہے۔