جرمنی کا یکم جولائی سے بیشتر ممالک کے لیے سفری پابندیاں اٹھانے کا اعلان

ہفتہ 12 جون 2021 20:19

’گرمیوں کے ساتھ امید اور اعتماد واپس آ رہے ہیں۔(فوٹو اے ایف پی)

جرمنی نے کورونا وائرس سے متعلق عائد سفری پابندیوں میں نرمی کا اعلان کیا ہے۔
خبر رساں ادارے اے ایف پی کے مطابق جرمنی کے وزیر خارجہ ہیکو ماس نے کہا ہے کہ جرمنی یکم جولائی سے زیادہ تر ممالک کے لیے کورونا کی عالمی وبا سے متعلق عائد اپنی سفری پابندیاں اٹھا لے گا۔
مزید پڑھیں
انہوں نے کہا کہ سات دنوں کے دوران ایک لاکھ افراد میں انفیکشن کی شرح 50 سے 200 درج کرنے والے ممالک کو اب ’رسک زون‘ نہیں سمجھا جائے گا۔
جرمن وزیر خارجہ کا کہنا تھا کہ ایسے ممالک جہاں انفیکشن کی شرح زیادہ ہے یا جہاں وائرس کی الگ الگ اقسام موجود ہیں جیسے کہ برطانیہ اور انڈیا۔
انہوں نے کہا ہے کہ ’گرمیوں کے ساتھ امید اور اعتماد  واپس آ رہے ہیں۔ بہت ساری جگہوں پر انفیکشن کی تعداد کم ہو رہی ہے اور زیادہ سے زیادہ شہریوں کو کورونا ویکسین کی خوراک دی جا چکی ہے۔‘
جرمن وزیر خارجہ نے کہا کہ ’ طویل مہینوں کے لاک ڈاؤن کے بعد ہم زیادہ معمول کے منتظر ہیں اور یہ سفر پر بھی لاگو ہوتا ہے۔‘
ہیکو ماس نے زور دے کر کہا کہ پابندیاں اٹھانا ’لاپرواہی کی دعوت‘ کے طور پر نہیں دیکھا جانا چاہیے۔
انہوں نے متنبہ کیا کہ ’2021 کے موسم گرما میں کوئی بھی تعطیلات کے دوران وبائی مرض سے حیرت کا دعویٰ نہیں کر سکتا ہے۔‘
واضح رہے کہ جرمنی نے حالیہ ہفتوں میں دکانوں اور ریستورانوں کو دوبارہ کھولنے کی اجازت دینے سمیت بیشتر پابندیوں میں آسانی پیدا کر دی ہے۔
تاہم دکانوں میں ماسک پہننے، سکول کے بچوں اور گھر سے کام کرنے والے ملازمین کے لیے باقاعدہ ٹیسٹ کے قوانین اب بھی برقرار ہیں۔