’خوش قسمتی‘ کی علامت نایاب گلابی ہیرا نیلامی کے لیے تیار

چمکتا ہوا یہ گلابی ہیرا ایک انگوٹھی میں نصب کیا گیا ہے (فوٹو: اے ایف پی)

رواں برس نومبر میں ایک نایاب قسم کے گلابی ہیرے کی نمائش ہو گی جہاں اس کے ساڑھے تین کروڑ ڈالر میں فروخت ہونے کا امکان ہے۔
خبر رساں ادارے اے ایف پی کے مطابق پیر کو کرسٹیز آکشن ہاؤس نے کہا ہے کہ یہ 18 قیراط سے زیادہ وزن کا حامل ناشپاتی کی شکل کا سب سے بڑا گلابی ہیرا ہے جسے نیلامی میں فروخت کے لیے پیش کیا جائے گا۔
مزید پڑھیں
چمکتا ہوا یہ گلابی ہیرا ایک انگوٹھی پر نصب کیا گیا ہے جو دو طرف سے ایک بڑے سفید ہیرے سے جڑا ہوا ہے۔ اس کا وزن 18اعشاریہ 18 قیراط ہے۔
کرسٹیز کے مطابق یہ ایشیا میں خوش قسمت عدد سمجھا جاتا ہے اور وہاں یہ ’یقینی خوش قسمتی‘ کی علامت ہے۔
انہیں امید ہے کہ یہ ہیرا ’دنیا بھر کے شوقین افراد‘ کی توجہ اپنی جانب مرکوز کروائے گا۔
کرسٹیز آکشن ہاؤس میں زیورات کی ماہر انجیلا برڈن نے کہا ہے کہ ’یہ ایک خوبصورت پتھر ہے اور اس سائز کا گلابی رنگ کا ہیرا ملنا نہایت مشکل ہے۔‘
واضح رہے کہ سنہ 2018 میں کرسٹیز نے 18.96 قیراط کا ونسٹن پنک لیگیسی نام کا ہیرا پانچ کروڑ ڈالر میں فروخت کیا تھا۔