خیبرپختونخوا کے گرم علاقوں میں پرائمری سے مڈل تک سکول بند رہیں گے

پیر 14 جون 2021 13:26

صوبائی محکمہ تعلیم نے سرد علاقوں میں سکول کے اوقات کار تبدیل کیے ہیں (فوٹو: اے ایف پی)

خیبرپختونخوا میں گرمی کی شدت کے پیش نظر گرم علاقوں میں پرائمری سے مڈل تک سکول بند کرنے کا اعلان کیا گیا ہے جبکہ صوبائی محکمہ تعلیم نے سرد علاقوں میں سکول کے اوقات کار تبدیل کیے ہیں۔
مزید پڑھیں
خیبرپختونخوا کے وزیر تعلیم شہرام ترکئی نے پیر کو اپنی ٹویٹ میں بتایا کہ ’ونٹر زون میں پرائمری سے لے کر ہائیر سیکنڈری سکولز نارمل اوقت کار کے مطابق کھلے رہیں گے جبکہ سمر زون (گرم علاقوں) کے تمام پرائمری اور مڈل سکولز تا حکم ثانی بند رہیں گے۔‘
شہرام ترکئی نے ایک اور ٹویٹ میں بتایا کہ ’ونٹر زون کے کچھ گرم علاقوں اور یونین کونسلز میں پرائمری سے مڈل تک کے سکولز تا حکم ثانی بند رہیں گے۔ گریڈ نو سے گریڈ 12 تک کے طلبہ کے لیے سکول کھلے ہوں گے اور انہیں صرف وہ مضامین پڑھائے جائیں گے جن کے امتحان ہوں گے۔ ان تمام فیصلوں کا اطلاق تمام سرکاری و نجی سکولوں پر ہوگا۔‘