پاکستان کرکٹ ٹیم انگلینڈ کے خلاف لارڈز کرکٹ گراؤنڈ پر کھیلا گیا دوسرا ایک روزہ میچ 52 رنز سے ہار گئی، اس طرح سیریز انگلینڈ نے 1-2 سے جیت لی ہے۔
میزبان انگلش سائیڈ نے پہلے بیٹنگ کرتے ہوئے مقررہ 47 اوورز میں 247 رنز بنائے اور پاکستانی ٹیم کو جیت کے لیے 248 رنز کا ہدف دیا۔
پہلے ہی اوور میں اوپنر امام الحق کی وکٹ کھونے والی مہمان ٹیم کی وکٹیں یکے بعد دیگرے گرتی رہیں اور پوری ٹیم 41 اوورز میں 195 رنز بنا کر آؤٹ ہو گئی۔
مزید پڑھیں
پاکستان کی جانب سے اوپنر امام الحق ایک، فخر زمان 10، کپتان بابر اعظم 19، محمد رضوان پانچ، صہیب مقصود 19، شاداب خان 21 اور فہیم اشرف ایک رنز بنا کر آؤٹ ہوئے۔
پاکستان کی جانب سے سعود شکیل نے سب سے زیادہ 56 رنز بنائے۔ 77 گیندوں پر مشتمل ان کی اننگز میں چار چوکے بھی شامل تھے۔
سنیچر کو بارش سے متاثرہ میچ تاخیر کا شکار ہونے کی وجہ سے 47 اوورز تک محدود کر دیا گیا تھا۔
دوسرے ون ڈے میچ کا ٹاس پاکستان نے جیت کر پہلے فیلڈنگ کا فیصلہ کیا تھا۔
قبل ازیں پہلے بیٹنگ کرتے ہوئے انگلینڈ کی ٹیم بھی مقررہ 47 اوورز مکمل نہیں کھیل سکی تھی۔ حسن علی کی پانچ وکٹوں کی بدولت میزبان سائیڈ 45.2 اوورز میں 247 رنز بنا پائی تھی۔
انگلینڈ کی جانب سے اوپنر فل سالٹ نے 60 رنز بنائے، جیمز ونسے 56 ، لیوس گریگوری 40، برائیڈن کیرس 31 اور کپتان بین سٹوکس 22 رنز بنا سکے تھے۔
حسن علی نے 9.2 اوورز میں 51 رنز دے کر پانچ وکٹیں حاصل کیں (فوٹو: آئی سی سی)