Entertainment

شوبزستارے شعیب اخترپربرس پڑے

فائل فوٹو

پی ایس ایل 6 کا ترانہ ” گُروومیرا” اپنی ریلیز کے ساتھ ہی سوشل میڈیا پر بھرپور توجہ حاصل کرنے میں کامیاب رہا جس کی وجہ اس پر ہونے والی تنقید کےعلاوہ بڑی تعداد میں پسندیدگی بھی بنی۔

سابق کرکٹرشعیب اختر کا شمار ان افراد میں ہے جنہیں یہ ترانہ ایک آنکھ نہ بھایا لیکن ذرا الگ ہی انداز میں اپنی ناپسندیدگی ظاہر کرنا انہیں خاصا مہنگا پڑا، شوبز کی معروف شخصیات نے سوشل میڈیا پر شعیب کو آڑے ہاتھوں لے لیا۔

شعيب اخترکا کہناتھا کہ میرے بچے یہ سن کر ڈر گئے ، یہ کیسا گانا بنایا ہے۔ میں پی سی بی سے سخت ناراض ہوں اور ان پر کیس کرنے والا ہوں ان پر، پی سی بی کا کون شخص ہے جس نے اتنی بری کمپوزیشن اور اتنے برے گانے کا آئیڈیا اخذ کیا۔ کیا کسی کو شرم نہیں آئی؟ گُروو کا مطلب تو نالی ہوتا ہے۔

فرحان سعید ، انوشے اشرف، نوید رضا اور ہارون شاہد سمیت دیگر مشہور شخصیات نے شعیب اختر ان کے تبصرے پر براہ راست جواب دیا جبکہ فیشن ڈیزائنرحسین شہریار یاسین، عدنان صدیقی، حرا مانی، وسیم اکرم ودیگر سابق کرکٹرکا نام نہ لیتے ہوئے بھی بہت کچھ کہہ گئے۔

گلوکار فرحان سعید نے شعیب کی رائے کو احمقانہ قرار دیتے ہوئے کہا کہ گروو میرا “اسٹیڈیم میں فاتح” بنے گا۔

اداکارومیوزک کمپوزرہارون رشید نے سال 2013 میں آئی پی ایل کیلئے کولکتہ نائٹ رائیڈرزکا عجیب وغریب گانا شیئرکرتے ہوئے لکھا ” جب انہیں اس ٹیم کی جانب سے لاکھوں کی ادائیگی کی جارہی تھی اور یہ گانا آیا تھا تو میں شرط لگا سکتا ہوں کہ وہ شاہ رخ خان کو متاثر کرنے کے لئے ایڈن گارڈن میں اس پرڈانس بھی کرلیتے”۔

اداکارہ انوشےاشرف نے شعیب پرواضح کیا کہ اختلاف رائے آپ کا حق ہے لیکن کسی کو نیچا دکھانا نہیں۔ یہ گانا آپ کی فیملی، دوستوں ، پرستاروں سمیت بہت سے افراد کو پسند بھی آیا سو ناپسند کرنا بری بات نہیں لیکن نفرت نہ کریں۔

اداکار نوید رضا نے شعیب کو مشورہ دیا کہ تعریف کرنا سیکھیں، گروو میرا میرا ایک ٹھوس گانا ہے۔

عدنان صدیقی نے لکھا ” کم سے کم ہم اپنے فنکاروں کا احترام تو کرسکتے ہیں، کی بورڈ کا جنگجو بن کر کسی کی محنت کو ٹکڑے ٹکڑے کرنا آسان ہے ۔ ہم سب نصیبو لعل کے سریلے گانوں کو کتنی آسانی سے بھول گئے، گُروو میرا اتنی تنقید کا مستحق نہیں ”۔

عُمیر رانا نے وسیم اکرم کے خیالات مداحوں کے ساتھ شیئرکرتے ہوئے لکھا ” آئی لویو، جیتے رہیں”۔

وسیم اکرم نے مارننگ واک کے دورانج پنجابی کا تڑکا لگاتے ہوئے کہا کہ منہ اٹھا کے ہرچیز پرتنقید کررہےہیں، ٹھیک ہے کہ ہرایک کی مرضی ہوتی ہے لیکن اتنے تان سین آپ بھی نہیں۔ ہر بات پر بولنا ہوتا ہے لیکن کبھی غلطی سے بھی تعریف نہ کرنا۔

حرا مانی نے انسٹا پوسٹ میں نصیبو کی تعریف شیئرکرتے ہوئے لکھا ” اج دیکھے گا کراوڈ میری نصیبو کو ٹی وی پہ، واہ واہ واہ کیا گانا گادیا، یہ آواز یہ انداز، اصل فنکار اصل ہی ہوتا ہے”۔

حرا نے تنقید کرنے والوں کیلئے لکھا ” ہم آپ کی عزت کرتے ہیں میڈم، بس یہ نام نہاد نام نہاد ایلیٹ برگر میوزک کے ناقدین انٹرنیٹ کے دورکے ہم جیسے چنے منے فالوورز والے، انہیں کیا پتہ مداحوں کی پسندیدگی کیا ہوتی ہے۔

ایچ ایس وائی نے نصیبو سمیت تمام گلوکاروں کی تعریف کرتے ہوئے کہا کہ وہ یہ بار بار سن رہے ہیں۔

انسٹااسٹوریزمیں شیئرکیے جانے والے ایک تفصیلی نوٹ میں اداکار احمد علی بٹ نے لکھا ” ان لوگوں کے لئے جو نہیں جانتے کہ نصیبو لال ایک پاکستانی لوک گلوکار ہیں جنہیں 30 سال سے زائد گانے کا تجربہ ہے۔ انہیں کبھی ایسا لائم لائٹ نہیں ملا جس کی وہ مستحق تھیں کیونکہ ان کے بیشتر گانے “پنجابی فلمی دور” کےتھے۔ لیکن اس سے حقیقت تبدیل نہیں ہوتی”۔

اداکار نے کہا کہ گروو میرا ایک بہت اچھا گانا ہے اور پی سی بی کا دلیرانہاقدام ہے۔ اس کے تلفظ کا مذاق اڑانے والے سب وہی لوگ ہیں جو برطانیہ یا کینیڈا کے پنجابی گلوکاروں سے محبت کرتے ہیں۔ اب والیم کھولواوربولو ” اج ویکھے گا کراوڈ میرا گروو ٹی وی پہ۔”

ریلیز کے بعد سے اب تک ” گُروو میرا ” 60 لاکھ سے زائد ویوز کے ساتھ یو ٹیوب پرٹرینڈنگ پرہے”۔

متعلقہ خبریں