Entertainment

علی ظفرکی’برتھ ڈے پارٹی’ پرتنقید

شوبزستارے مداحوں کو کرونا سے بچاو کیلئے مشورے توبہت دیتے ہیں لیکن حال وہی لگتا ہے کہ ”خود میاں فصیحت اور دوسروں کو نصیحت ”۔ دیگربہت سی سیلیبرٹیز کی طرح گلوکار علی ظفر نے بھی اپنی سالگرہ کی تقریب منائی جس میں ایس اوپیز کو مکمل نظرانداز کردیاگیا۔

سالگرہ کی تقریب کی تصاویرسوشل میڈیا پرخاصی وائرل ہوئیں جن میں ماسک اور کسی قسم کے معاشرتی فاصلے کو خاطرمیں نہ لانا بخوبی دیکھاجاسکتا ہے”۔

سوشل میڈیا صارفین نے کرونا وائرس ایس او پیز کی پیروی نہ کرنے پر گلوکار اور ان کی سالگرہ کی تقریب میں شریک افراد کو تنقید کا نشانہ بنایا۔

نیشنل کمانڈ اینڈ آپریشن سنٹر کی جانب سے پاکستان میں اس وائرس کاپھیلاؤ روکنے کے لئے ہر قسم کے اجتماعات پرپابندی عائد کی گئی ہے، تاہم یہپہلا موقع نہیں جب سیلبرٹیزکی جانب سے اس عالمی وبا کیخلاف حفاظتی اقدامات کی خلاف ورزی دیکھنے میں آئی ہو۔

اس سے قبل اداکارہ ثروت گیلانی کے شوہرڈاکٹرفہد مرزا کی 40 ویں سالگرہ کے موقع پران کے گھر منعقد کی جانے والی محفل قوالی میں شریک منشاء پاشا، شہریارمنور، فریحہ الطاف ودیگرکی تصاویر وائرل ہونے کے بعد سوشل میڈیا صارفین نے شوبز شخصیات کی اس غیرذمہ داری پرانہیں تنقید کا نشانہ بنایا تھا۔

اداکار شہریارمنور نے تصاویر وائرل ہونے کے بعد اپنی غلطی تسلیم کرتے ہوئے معافی مانگ لی تھی، اداکار نے ٹویٹ میں لکھا تھا کہ ”میرے اس اقدام کی کوئی وضاحت نہیں ہے ”۔

فہد مرزا سے قبل سے ایمن خان نے منیب بٹ کی سالگرہ میں سیلبرٹیزکو مدعوکیا تھا جبکہ مومل شیخ نے بھی اپنے گھر پر” گیم نائٹ ”کا اہتمام کیا تھا جس میں متعدد شوبزستارے شریک ہوئے۔

پاکستان میں اب تک کرونا وائرس کے 8 لاکھ، 86 ہزار184 تصدیق شدہ کیسز رپورٹ ہوچکے ہیں جبکہ اموات کی تعداد 19 ہزار 856 ہے۔ وائرس سے تقریبا 7 لاکھ 99 ہزار 951 افراد صحتیاب ہوچکے ہیں۔

متعلقہ خبریں