مائنس ون فارمولے پر کام شروع، کل تحریک کے نئے مرحلے کا اعلان کروں گا: عمران خان

جمعہ 9 ستمبر 2022 16:08

عمران خان نے کہا کہ ’امپورٹڈ حکومت اور اس کے ہینڈلرز اس بات سے بوکھلاہٹ کا شکار ہیں‘ (فائل فوٹو: اے ایف پی)

پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے کہا ہے کہ ’وہ کل گوجرانوالہ کے جلسے میں اپنی تحریک کے اگلے اہم مرحلے کا اعلان کریں گے۔‘
عمران خان نے جمعے کو اپنی ٹویٹ میں لکھا کہ ’کل گوجرانوالہ جلسہ ہماری حقیقی آزادی کی تحریک کے پہلے مرحلے کا آخری جلسہ ہوگا۔‘
مزید پڑھیں
’میں اگلے اور اہم ترین مرحلے کا اعلان اس جلسے میں کروں گا۔ امپورٹڈ حکومت اور اس کے ہینڈلرز اس بات سے بوکھلاہٹ کا شکار ہیں کہ قوم پی ٹی آئی کے پیچھے مضبوطی سے کھڑی ہے، وہ مائنس ون فارمولے پر چل رہا ہے۔‘
دوسری جانب تحریک انصاف کے رہنما فواد چوہدری نے اسلام آباد میں نیوز کانفرنس کرتے ہوئے کہا ہے کہ ’یہ (حکومتی اتحاد) عمران خان کو ٹیکنیکل ناک آوٹ کی جانب لے جانا چاہتے ہیں۔‘
انہوں نے کہا کہ ’عمران خان سے اظہار یکجہتی کے لیے سنیچر سے ملک گیر احتجاج شروع کیا جا رہا ہے۔‘
فواد چوہدری نے خیبر پختونخوا اور پنجاب کے مختلف حلقوں میں ضمنی انتخاب ملتوی کرنے کے فیصلے پر تنقید کرتے ہوئے کہا کہ ’الیکشن کمیشن نے جن حلقوں میں الیکشن ملتوی کیا، وہاں سیلاب نہیں ہے۔‘
ان کا کہنا تھا کہ ’الیکشن کمیشن کے اقدام سے لگتا ہے وہ الیکشن نہیں کرانا چاہتا۔‘