ٹوئٹر صارفین اب ایپ استعمال کر کے رقم بھی کما سکیں گے

مائکروبلاگنگ ویب سائٹ ٹوئٹر نے اپنے آڈیو فیچر سپیس کا ایک نیا ورژن متعارف کرایا ہے جسے استعمال کرنے والے اس سے آمدن بھی حاصل کر سکیں گے۔
ٹوئٹر کی جانب سے کچھ عرصہ قبل کلب ہاؤس ایپلیکیشن کی مقابل سروس کے طور پر آڈیو چیٹ اور ڈسکشن کے لیے ’سپیسز‘ فیچر متعارف کرایا گیا تھا۔
اسی فیچر کے نئے حصے کے طور پر ٹوئٹر نے صارفین کو موقع دیا ہے کہ وہ آڈیو چیٹ رومز کی میزبانی کر کے اب رقم بھی کما سکیں۔
مزید پڑھیں
’ٹکٹڈ سپیسز‘ کے نام سے متعارف کرائے گئے نئے فیچر میں میزبان کے پاس یہ موقع ہو گا کہ وہ اپنی سرگرمی سے سبسکرپشن کی بنیاد پر آمدن حاصل کر سکے۔
ٹوئٹر کی آفیشل بلاگ پوسٹ کے مطابق اب صارفین ٹوئٹر ایپ کی سائیڈ بار میں مونیٹائزیشن کا آپشن دیکھیں گے۔ اس پر کلک کرنے والے مونیٹائزیشن پروگرام کا حصہ بن سکیں گے جو ابھی تک بیٹا ورژن کی سطح پر ہے۔
ٹوئٹر کی جانب سے اس مقصد کے لیے اینڈرائڈ اور آئی او ایس صارفین کے لیے الگ ایپلیکیشن بھی متعارف کرائی گئی ہے۔

ٹوئٹڑ صارفین کو کتنی آمدن ہو گی؟

ٹوئٹر کی سینئر پروڈکٹ مینیجر ایستھر کرافورڈ کے مطابق کنیٹ کری ایٹرز کو آمدن کا 97 فیصد کمیشن دیا جائے گا جو ایک ڈالر سے 999 ڈالر تک ہو سکتا ہے۔

مائکروبلاگنگ پلیٹ فارم خود آمدن کا تین فیصد پراسیسنگ فیس کی مد میں وصول کرے گا۔

ایستھر کرافورڈ کے مطابق جب کسی فرد کی آمدن 50 ہزار ڈالر ہو جائے گی تو اس کے بعد ٹوئٹر اس آمدن میں اپنے شیئر تین فیصد کو بڑھا کر 20 فیصد پر لے آئے گا۔
’ٹکٹڈ سپیسز‘ کا فیچر نئی متعارف کردہ فیچرز میں اکلوتا نہیں بلکہ مائکروبلاگنگ پلیٹ فارم نے سپیسز شیڈولنگ، متعدد ہوسٹ کنٹرولز، بہتر سیکیورٹی اور آسانی سے تلاش کے ساتھ ساتھ سپیسز کی مشترکہ میزبانی کی سہولت بھی مہیا کی ہے۔

ٹکٹڈ سپیسز کہاں دستیاب ہیں؟

اس وقت ٹوئٹر کی اعلان کردہ ٹوئٹر سپیسز بیٹا امریکا میں صارفین کو میسر ہیں۔ ابتدا میں جن صارفین کو اس فیچر تک رسائی دی گئی ہے ان کے فیڈبیک کو استعمال کیا جائے گا۔ بعد میں یہ سروس سبھی صارفین کو مہیا کی جائے گی۔

ٹوئٹر کی جانب سے اپنی آمدن میں اضافے کے لیے حالیہ عرصے میں متعدد اقدامات کیے گئے ہیں (فوٹو: پکسابے)

ٹوئٹر پر مونیٹائزیشن کے لیے مزید کیا؟

ٹوئٹر کی جانب سے ’ٹکٹڈ سپیسز‘ کے ساتھ ساتھ ’سپر فالوز‘ کے لیے بھی درخواستیں وصول کی جا رہی ہیں۔ سبسکرپشن کی بنیاد پر مہیا کیا جانے والا یہ فیچر بھی اب تک امریکی صارفین کے لیے دستیاب ہے۔

سپر فالووز سے آمدن کیسے؟

سپر فالووز کی مدد سے کری ایٹرز کو انگیجڈ صارفین تک براہ راست مہیا کی جائے گی، اس سے ماہانہ بنیادوں پر آمدن حاصل کی جا سکے گی۔

مونیٹائزیشن فیچرز کی آمدن کا 97 فیصد کری ایٹرز کو دیا جائے گا (فوٹو: ٹوئٹر)
اس فیچر کو استعمال کرنے والے اپنے صارفین کو بونس کنٹینٹ اور قریبی رابطے کے مواقع مہیا کریں گے، جس کے بدلے دیگر صارفین انہیں سبسکرائب کر سکیں گے۔
سپرفالووز کے ذریعے کری ایٹرز اپنے فالوورز سے 2.99، 5.99 یا 10 ڈالر ماہانہ حاصل کر سکیں گے۔ یہ فیچر بھی ابتدائی طور پر امریکی صارفین کے لیے پیش کیا گیا ہے۔
ٹوئٹر کی جانب سے مونیٹائزیشن سے متعلق یہ اقدام ایک ایسے وقت میں کیا گیا ہے جب آڈیو ڈسکشن کی خدمات مہیا کرنے والی ایپلیکیشن کلب ہاؤس بھی مونیٹائزیشن فیچر متعارف کرا چکی ہے۔
کلب ہاؤس کے صارفین انٹیریکٹو پوڈکاسٹس کی میزبانی کے ذریعے رقم کما سکتے ہیں۔