کراچی میں لاکھوں روپے مالیت کی نایاب ہیرا مچھلی کا شکار

پاکستان کے ساحلی شہر کراچی کے قریب گہرے سمندر میں ابراہیم حیدری کے علاقے میں ماہی گیروں کو لاکھوں روپے مالیت کی ہیرا مچھلی ملی ہے۔
پاکستان کے سمندری حدود میں کم پائی جانے والی ہیرا مچھلی کے جھنڈ کے شکار پر ماہی گیر کافی خوش ہیں۔
مزید پڑھیں
کوسٹل میڈیا سینٹر ابراہیم حیدری کے ترجمان کمال شاہ کے مطابق کراچی کے ساحلی علاقے ابراہیم حیدری سے شکار کے لیے جانے والی لانچ کے ماہی گیروں نے کراچی کے قریب گہرے پانی میں ہیرا مچھلی کا ایک جھنڈ سمندر میں دیکھ کر جال ڈالا۔
’ماہی گیر ہیرا مچھلی کے جھنڈ کو جال کے قریب لانے میں کامیاب ہوگئے اور سینکڑوں کی تعداد میں مچھلیاں ان کے ہاتھ لگ گئی۔‘

نایاب ہیرا مچھلی کا شکار مشکل سے ملتا ہے (فوٹو: سکرین گریب)
کمال شاہ کا کہنا ہے کہ ’پاکستانی مارکیٹ میں سمندری ہیرا مچھلی کی بہت مانگ ہے۔ اس کی قیمت 600 سے 700 روپے فی کلو ہے۔‘
انہوں نے مزید کہا کہ ’سمندر میں نایاب ہونے کی وجہ سے اس مچھلی کا شکار بہت مشکل سے ہی ملتا ہے۔‘