کرونا وائرس:30 سال سے زائد عمر والوں کی ویکسینیشن کا اعلان

این سی او سی کے سربراہ اسد عمر نے بتایا ہے کہ 16مئی سے30سال اور زائد عمر کے افراد کی رجسٹریشن کھولنے کا فیصلہ کیا ہے۔

بدھ کی صبح اسد عمر نے ٹویٹ کرتے ہوئے بتایا کہ ملک میں ویکسین کی دستیابی میں بہتری آرہی ہے۔ ویکسین سپلائی میں اضافے کیساتھ ویکسینیشن کیٹیگری میں اضافہ کیا جارہا ہے۔

بدھ کو نیشنل کمانڈ اینڈ آپریشن سینٹر نے بتایا ہے کہ 1 دن میں مزید 104 افراد کرونا وائرس کے باعث  انتقال کرگئے جن میں سے 49 مریضوں کا انتقال وینٹیلیٹر پر ہوا۔ 24  گھنٹوں میں 2 ہزار 869 نئے کرونا کیسز رپورٹ ہوئے اور ملک میں مثبت کرونا کیسز کی شرح 7.42 فیصد ہے۔

این سی او سی کےمطابق سب سے زیادہ پنجاب میں 63 اموات،خیبرپختونخوا میں 24 اموات ہوئیں۔ سندھ 12 ، اسلام آباد 2،  بلوچستان میں 2، آزاد کشمیر میں ایک مریض کا وائرس سے انتقال ہوا۔کرونا سے مجموعی اموات کی تعداد 19 ہزار 210 ہو گئی ہے۔گزشتہ 24 گھنٹوں کے دوران 38 ہزار 616 ٹیسٹ کئے گئے اور فعال کیسز کی تعداد76 ہزار 536 تک پہنچ گئی ہے۔ وائرس سے صحت یاب ہونے والوں کی تعداد 7 لاکھ 71 ہزار 692 ہوگئی ہے جبکہ ملک بھر میں کرونا وائرس کے مجموعی کیسز کی تعداد 8 لاکھ 67 ہزار 438 ہوگئی ہے۔

این سی او سی نے مزید بتایا کہ 5 ہزار 184 مریض 639 اسپتالوں میں زیر علاج ہیں۔ پشاور میں 41 فیصد، ملتان میں 73 فیصد، لاہورمیں 63 فیصد گجرانوالہ میں 52  فیصد وینٹیلیٹرز بھر چکے ہیں۔ گوجرانوالہ میں 64 فیصد، پشاور 51 فیصد،ملتان میں 54 فیصد اور صوابی میں 60 فیصد آکسیجن بیڈز پر مریض موجود ہیں۔

منگل کو این سی او سی کے سربراہ اسد عمر نے ویکسینیشن کے عمل سے متعلق اہم وضاحت کی ہے۔ انھوں نے ٹویٹ کرتے ہوئے بتایا کہ عمر کے لحاظ سے ویکسینیشن کا عمل دنیا میں محدود ویکسین دستیابی کے باعث شروع کیا۔ ویکسین کی سپلائی اور ویکسینیشن میں ٹھوس کاوشوں سے اضافہ ہو رہا ہے۔40 سال سے کم عمر کے افراد میں شرح اموات 1 فیصد سے بھی کم رہی جبکہ 41 سے 50 سال کی عمر کے افراد میں شرحِ اموات 1.8 فیصد رہی۔51 سے 60 میں 3.8فیصد، 61 سے 70 میں 7.2 فیصد شرح اموات رہی۔ انھوں نے بتایا  کہ 71 سے 80 سال میں 11.1 فیصد اور 80 سے زائد عمر کے افراد میں شرح اموات 15 فیصد رہی۔

اسد عمر کا مزید کہنا تھا کہ ویکسین پہلے ان طبقات کو لگائی گئی جنہیں متاثر ہونے کا زیادہ خطرہ تھا۔کرونا کے باعث اموات کی شرح عمر کے ساتھ بڑھتی ہے۔7 فیصد پاکستانی 60 سال کے عمر سے زائد ہے۔53 فیصد کرونا سے اموات 60 سال سے زائد عمر کے افراد کی ہوئیں۔77 فیصد پاکستانی 40 سال کی عمر سے کم ہیں۔9 فیصد اموات 40 سال سے کم عمر کے افراد کی ہوئیں۔

متعلقہ خبریں